LAOAG CITY – Nakasagana ni SK Federated President Faye Lao ditoy ciudad ti Laoag a mangsango ti reklamo kontra kenkuana.
Daytoy ket mainaig iti reklamo iti konseho ni SK Chairwoman Mary Dianne Domingo iti Barangay 47, Bengcag ditoy ciudad ti Laoag.
Immun-una iti daytoy, nagsurat ni Domingo iti konseho para iti panangipila na ti kaso administratibo kontra ken ni Lao gapu iti misconduct ken gross inefficiency resulting to loss of confidence.
Kuna pay ni Domingo nga iti nasurok a dua a tawen ni Lao iti posisyon na ket awan pay dagiti napapateg a proyekto ken nagdur-asan ti liderato na a mangipakita a saanna a kabaelan ken awan ti ammo na.
Innayon na nga awan pay ti maiyus-uswat a taripnong da gapu iti kaawan ti quorum.
Iti panagsaludsud ti Bombo Radyo ken ni Lao no ania ti namonganayan ti reklamo kenkuana ket inbaga na a daytoy pay laeng ti isyu mainaig iti panagpatraining da iti maysa a resort ditoy ciudad ti Laoag.
Kuna pay ni Lao a ti nasao a kaso ket manarimaan a maad-adal ken maim-imbestigar iti Commission on Audit wenno COA.
Kinontra met ni Lao ti maibagbaga nga awan dagiti napipintas a proyekto na kabayatan ti panagtakem na kas SK Federated President ditoy ciudad ti Laoag.
Inpetteng ni Lao nga ado dagiti proyekto da iti baet nga awan ti pondo da.
Sinungbatan pay ni Lao ti maipagarop a kanayun a kaawan ti taripnong da gapu ta awan ti quorum no sadinno a kunana a kanayun ti panangbagbaga na kadagiti kakadwa na nga agatendar ti sesyon.
Innayon na a dua nga aldaw sakbay ti regular sesyon da ket patuludan na dagiti SK chairmen ti imbitasyon ken no adda ti aglangan kadakuada ti mamindua a daras ket mangisyu ti memorandum.
