LAOAG CITY – Inlawlawag ni SK Federated President Dandan Mabanag iti ili ti Vintar a saan a quarterly budget ti inpasa ti Sang. Bayan nga agarop 266 a milyon a pisos.
Daytoy ket kalpasan nga adda ti rimuar nga impormasyon a saan nga Annual Budget ti inpasa ti Sang. Bayan ken saan pay a pinirmaan ni Mayor Larrisa Foronda.
Segun kenni Mabanag, adda pay dagiti sumagmamano a departamento iti lokal a gobierno ti saan pay a naka-comply wenno nakaisumitir ti dokumento a mangsuportar iti kiddaw da a budget.
Karaman ditoyen ti Engineering Office, Agriculture Office ken dadduma pay.
Nupay kasta, kunana nga uray minimal budget pay laeng ti naited kadagiti sumagmamano a departamento ket saan da nga inyalokar iti sabali ti pondo no diket maited met laeng kadagitoy apaman a makumpleto da dagiti kasapulan a dokumento.
Inpalgak na pay a gapo ta adda pay laaeng ti mapaspasaran a pandemya ken saan met pay a makabyahe dagiti opisyal ket nalimitaran agingga iti lima ribo a pisos ti travel allowance iti opisina ti Mayor ken uray isuda a miembro ti Sang. Bayan.
Mainaig iti daytoy, kunana a no kurang met ti pondo a naaprubaran para kadagiti sumagmamano a departamento ket supplemental budget ti maaramid laketdi maisubmitir dagiti maseknan dagiti dokumento a mangsuporta iti kiddaw da.
Kabayatanna, inpetteng na nga inaramid da laeng ti trabaho da kas Sang. Bayan.
