LAOAG CITY – Nangipasa ti gakat ni Sangguniang Kabataan Federated President Michael Christophe Agustin kas panangipadanon iti pannakipagladingit iti pamilia ni Region 1 Athletic Association gold medalist a ni Carl Niño Acosta a residente iti Barangay 45 Tangid ditoy siudad ti Laoag.
Segun ken ni Agustin, ni Carl Niño ket maysa kadagiti maipanpannakkel ditoy siudad ti Laoag kas maysa kadagiti kalaingan nga atleta iti men’s gymnastics.
Inbatadna a nangrugi ni Acosta a makisalsalip iti gymnastics idi daytoy ket Grade 3 pay laeng agingga a naasa ken nakibinnalubal iti local wenno national competitions.
Inlawlawagna a babaen iti gagar ken disiplina iti panagay-ayamna ket naruay a balitok a medalya ti nagun-odna.
Maipalagip a naitaray iti ospital idi Abril 20 ni Carl Niño gapu ta na-out of balance daytoy iti panagpuligosna iti ngato rason a saanna a nabalanse ti panagdissona iti gymnastics springboard ken pimmusay isuna idi Mayo 1.
Kabayatanna, ti nasao a gakat ket sangsangkamaysa nga inaprobaran ti konseho ditoy siudad ti Laoag.
