LAOAG CITY – Naka-skeletal workforce dagiti amin nga empleado ti gobyerno probinsyal.
Daytoy ti kinumpirmaran ni Provincial Human Resources and Development Officer Fe Siazon ti kapitolio probinsyal.
Kuna na a nangrugi ita nga aldaw ti pannakaiyimplementar ti Skeletal Workforce dagiti 1,300 nga empleado iti gobyerno probinsyal agraman dagiti opisina nga adda iti ruar ti kapitolyo.
Inbatad ni Siazon a daytoy ket kalpasan nga inmandar kenkuana ni Gov. Matthew Marcos Manotoc a nasken a malimitaran ti bilang dagiti empleado iti uneg ti maysa nga opisina tapno maliklikan ti panaguummong ken maobserbar ti Social Distancing.
Inlawlawag na a daytoy ket kalpasan nga adda dua nga empleyado ti kapitolyo probinsyal a nagpositibo iti COVID-19 nga isuda IN-C27 kenni IN-C30.
Nupay kasta, saan na nga ammo no kaano nga agngudo ti implementasyon ti skeletal workforce iti gobyerno probinsyal.
Innayon na a nakadepende kadagiti Department Heads no kasano ti pannakaipatungpal skeletal workforce ken ti work-from-home kadagiti empleyado da.
Maipalagip a nairikep ti Office of the Barangay Affairs ken opisina ti OWWA itay bigat, Agosoto 3, 2020.
