LAOAG CITY – Inbatad ni Barangay Kagawad Juvy Ramos iti Brgy. 16 San Marcos iti ili ti San Nicolas a nabiit pay a naispasdek a slope protection wall project a nadadael gapu pay laeng iti agtultuloy a panagtudutudo gubuay iti Super Typhoon.
Segun kenkuana, adda ti immununa a gundaway a narba ti nasao a proyekto ngem dagos daytoy a natarimaan.
Kinunana nga idi laeng bulan ti Mayo daytoy a naipasdek ken proyekto iti National Government.
Nupay kasta, inpakaammo ni Ramos a naireport ti nadadael a proyekto iti biang ti contractor ti nasao a proyekto tapnu insigida a maaksionan.
Malaksid iti daytoy, nga iti agdama ket awan dagiti nagbakwit a residente iti nasao a lugar, adda ti 38 a pamilia ti nalayus ti pagtaenganan no sadinno naipadanon daytoyen iti biang ti Provincial Social Welfare and Development Office tapnu maikkan iti relief goods.
