LAOAG CITY – Naiyuswat ti Ceremonial Energization wenno pannakapasilaw ti dakkel a mall iti Barangay 51-B, Nangalisan ditoy ciudad ti Laoag.
Nagyaman ni Mr. Cipriano “Perry” Martinez, ti Acting General Manager iti Ilocos Norte Electric Cooperative (INEC), gapu ta kalpasan ti ado a karit iti kooperatiba ket nagballigi da metlaeng a nangikonektar ti kuryente iti nasao a mall.
Kuna na a kasapulan ti uray 4megawatts a suplay ti kuryente tapno makarugin nga agoperar dagiti pasdek negosyo.
Inpasigurado pay ni Martinez a sidadaan ti kooperatiba a makitinnulong para iti ad-adda pay a panagdur-as, saan laeng a ditoy ciudad ti Laoag no di ket iti intero nga Ilocos Norte.
Mainaig iti daytoy, patien ni Martinez nga iti naan-anay a panaglukat ti mall ket ad-ado manen a trabaho ti mabalin a pagserkan ti umili ditoy probinsya.
Ti mall ditoy ciudad ti Laoag ket manamnama nga aglukat intono Mayo 23 ita a tawen.
