LAOAG CITY – Nakapartuat ti University of New South Wales idiay Australia ti maysa a wagas tapno maammoan no nabanglesen ti gatas babaen iti vibration motor dagiti smartphone.
Iti babaen ti VibMilk, mabalinna a maammoan no nabangles ti gatas a saan a lukluktan ti tetrapack daytoy.
Daytoy ket maysa a solusion a mabalin a makakissay iti minilyon a litro a masaysayang a gatas iti kada tawen.
Agus-usar ti VibMilk ti vibration motor ti smartphone ken machine learning tapno arisiten dagiti panagbalbaliw iti density, viscosity ken surface tension ti gatas kabayatan a mabangbangles.
Napaneknekan a 98.35 percent ti accuracy daytoy iti panangduktal ti pH levels ti gatas ken 100 percent iti panangduktal no mayat pay daytoy.
Gagem daytoy a teknolohia ito a maipaayaan dagiti gumatgatang ti napintas a wagas tapno maliklikan ti pannakasayang dagiti taraon ken maliklikan ti food poisoning.
