LAOAG CITY – Inpetteng ti maysa nga Agricultural Economist a papigsaen ti kampania kontra kadagiti smuggled a tabako ken sigarilio nga agtultuloy a makaapektar iti ekonomia ti pagilian ken pagbiagan dagiti mannalon.
Segun ken ni Agricultural Economist ken University of the Philippines Los Baños’ Assistant Professor Dr. Julieta A. Delos Reyes, kasapulan ti panagtignay ti nagbalin a panawagan ni Pres. Ferdinand Marcos Jr. a papigsaen ti kampania kontra iti smuggling ti tabako.
Iti taripnong ti Private Sector Advisory Council-Agriculture Sector Group (PSAC-ASG), inbilin ti Presidente ti Bureau of Customs, Bureau of Internal Revenue ken Department of Trade and Industry a papigsaen dagiti addang tapno malappedan ti smuggling ti tabako ken vape products tapno maprotektaran ti industria ti tabako ken dagiti agmulmula iti daytoy.
Iti panagsukisok ti University of Asia and the Pacific, ti smuggling ti tabako sipod idi 2018 agingga 2022 ket nangpabagsak ti Gross Domestic Product (GDP) ti Pilipinas ti P378.9 bilyon ken domestic output a dumanon iti P592.1 bilyon.
