LAOAG CITY – Kinumpirmaran ni Dr. Loida Valenzuela, ti provincial veterinarian ditoy probinsya nga adda ti nakumpiskar nga smuggled items manipod iti lugar a maibilang a red zone ti African Swine Fever (ASF).
Segun ken ni Valenzuela, awan ti aniaman a dokumento a naipakita ti driver ti maysa a bus company ditoy siudad ti Laoag kadagiti smuggled items rason a dagus a nakumpiskar.
Inbatad na nga umabot iti 62.58 a kilos ti nakumpiskar nga assorted products ken 16 nga unlabeled products.
Kabayatanna, kuna ni Valenzuela nga insegida a naikali iti slaughter house ditoy siudad ti Laoag dagiti nakumpiskar.
Naaamoan a kadua ti provincial veterinarian dagiti meat inspectors ken PNP-Laoag iti pannakakumpiskar dagiti smuggled items.
Immunan nga inbaga ni Valenzuela a saan a naipalubos nga iti border checkpoint ti nakaiyuswatan ti inspeksyon iti lugan a nagkarga kadagiti smuggled items gapu ta adda ti sursuruten a protocol ti bus company nu sadino nga iti mismo a terminal ti pakaisayangkatan ti inspeksyon.
