LAOAG CITY – Inlawlawag ni Mr. Norwell Berdadero, maysa kadagiti Grade 12 Adviser ti Solsona National High School – Maananteng Campus iti isyu maipapan iti maipagarup a panangi-required-da kadagiti estudiante nga agpa-make up iti uneg ti pagadalan.
Daytoy ket kalpasan a masapol nga adda ti 20 a porsiento nga itedda iti pagadalan iti bayadda ti panagpa-make up kadakuada.
Segun ken ni Mr. Berdadero, saanda a piliten dagiti agad-adal nga agpa-make up iti uneg ti pagadalanda para iti pictorial dagitoy.
Inbatadna a ti maited a gatad iti pagadalan ket para iti sukat ti kuriente gapu ta adda dagiti agus-usar ti kuriente iti pagadalan para iti plantsa wenno pagkulot iti buok pakairamanan ti bayad iti silaw.
Kunana nga iti kallabes, adda dagiti sumagmamano nga estudiante a mangus-usar iti pagadalan tapno ag-make up dagitoy ngem awan ti ibatbatida nga aniaman a bayad.
Mainaig iti daytoy, segun ken ni Mr. Rommel Buenavidez, ti Principal ti nasao a pagadalan nga awan ti napagsasaritaanda iti naisayangkat a taripnong nga inatendaran pay dagiti Parents Teachers Asssociation pakaseknan iti nasao a banag.
Naammoan nga immannugot met ni Mrs. Marites Neri, ti Presidente ti Parents Teachers Asssociation ti nagbalin a takder ti nasao a Principal.
Kabayatanna, basar iti pannakisarsarita ti News Team ti Bombo Radyo Laoag kadagiti maseknan nga estudiante nga adda ti maited a bayad iti pagadalan.
