LAOAG CITY – Inbatad ni Director Irene Dumlao, ti pannakangiwat ti Department of Social Welfare and Development (DSWD) nga agtultuloy ti panangiyimplementar da ti Social amelioration program ti gobierno national.
Kuna na a ti nasao a programa ket para laeng kadagiti 18 milyon a pamilya a karaman iti Low-income wenno informal economy sector ken ti addaan ti pamilya a karaman iti vulnerable sector.
Inpakaammo ni Dumlao nga itay napan a lawas ket rinugyan dan ti nangipaay ti emergency subsidy iti nasurok a 3.6 milyon a benepisyaryo ti Pantawid Pamilyang Pilipino Program (4Ps).
Inlawlawag na nga iti rehiyon uno ket P5,500 ti maximum a maawat ti eligible beneficiary.
Gapu iti daytoy, inbatad ni Dumlao a ninayunan da ti P4,150.00 iti naipan iti cash card dagiti 4Ps malaksid iti aw-awaten da a P1,350.00 iti kada bolan tapno mapagbalin a P5,500.00.
Inpakaammo met ni Dumlao a maarisit a naimbag dagiti pamilya a saan a miembro ti 4Ps a possible a maala para iti nasao a programa.
Innayon na a katulungan da ti lokal a gobierno gapu ta isuda a mismo ti makaammo ti sitwasyon dagiti residente tapno masigurado a dagiti maala a mairaman iti programa ket dagiti pudno nga agkasapulan ken awan pulos ti pamastrekan na kabayatan ti Enhanced Community Quarantine gapu iti covid-19.
Kabayatanna, inbatad ni Dumlao a dagiti agpenpension ket saan a mabalin nga agbalin a benepisyaryo ti programa, bassit man wenno dakkel ti aw-awaten da iti kada bolan.
