LAOAG CITY – Inlawlawag ni Ms. Janine Altero, maysa a social marketing officer iti DSWD Region 1 ti pannakaipaay ti Social Amelioration Program – Livelihood Assistance Grants (SAP-LAG).
Segun ken ni Altero, dagiti prayoridad a benepisyaryo ti nasao a programa ket dagiti addaan ti low-income wenno naapektaran ti negosyo wenno pagtrabahoan iti baet ti pandemiya, addaan ti maysa a miembro ti pamilya nga adda iti informal sector, miembro ti Pantawid Pamilyang Pilipino Program (4P’s) laketdi adda iti Pantawid Database ti naganda, ken saan a benepisyaryo ti programa ti sabali nga ahensya.
Inbatad na a 15,000 ti maipaay iti kada benebisyaryo nu sadino a masapol a mausar iti panangbiag ti baro a negosyo wenno pamastrekan ngem maminsan laeng a maipaay.
Nu pay kasta, kuna na a dagiti nakaawat ti SAP iti Department of Agriculture ket saanen a mabalin nga umawat pay ti Livelihood Assistance Grant.
Immunan a naireport dityo Bombo Radyo Laoag ti reklano iti Brgy. Cataban ditoy siudad seknan kadagiti naikan ti porma ti SAP-LAG a patien dagiti sabali a saan kuma a rumbeng a maikkan.
Nu pay kasta, inbunannag ni Altero a nga umuna nga agipasa iti biang ti barangay ti assessment dagiti posible a benepisyaryo iti LGU ken kalpasan na ket daytoy ti mangiyuswat ti pre-assesment.
Innayun na a nu malpas iti LGU, maiyendorso iti DSWD ken dagitoy metten ti agballay-balay a mangiyuswat ti validation tapno maarisit a nalaing dagiti kwalipikado a benepisyaryo.
Kabayatanna, inpakaamo ni Altero nga addan ton makaawat ti benepisyo manipod iti SAP-LAG intuno umay a lawas ditoy probinsya.
