LAOAG CITY – Nangipeksa ti panagdanag ti Philippine Society of Nephrology (PSN) kadagiti social media post nga arig mangipakpakita a mabalin nga ilako ti bato wenno kidney kasukat ti concert tickets.
Basar iti grupo, uray mabalin nga angaw laeng dagiti nasao a post, seryoso daytoy a mapagsasaritaan iti organ trafficking ken panaglako dagiti paset ti bagi gapu ta makaapektar daytoy kadagiti nakakapsot a sektor ken iti dignidad ti tao.
Inbatad ti Philippine Society of Nephrology a dagiti kastoy a representasion ket mabalin a mangpababa iti dagsen nga aramid a saan nga etikal, illegal ken maikanniwas kadagiti prinsipio ti umno nga organ donation ken transplantation.
Nagpalagip ti organisasion kadagiti indibidual, grupo ken dagiti brand nga agbalin a naannad ken sensitibo iti panagaramid dagiti pampubliko a content nga adda ti pakainaiganna iti salun-at ken dignidad ti tao.
