LAOAG CITY –Binabalaw ti grupo a Social Watch Philippines (SWP) ti panagbaba ti pondo para iti social services iti naisingasing a national budget para iti tawen 2027.
Segun ken ni SWP Senior Budget Specialist Alce Quitalig, kangrunaan a nakapasar ti bidget cut inton sumaruno a tawen dagiti programa a direkta a mangipapaay ti suporta kadagiti marigrigat ken vulnerable groups, kasta payen dagiti inisiatiba a gagemna a maipangato iti kalidad ti biag ti tunggal Pilipino.
Inlawlawag ni Quitalig nga ad-adda a pinadakkel ti gobierno ti pondo para kadagiti mandatory program wenno obligasion a kasapulan a bayadan ti gobierno a rason tapno bumassit ti fiscal space para kadagiti direkta a serbisio dagiti umili.
Impettengna pay a saan a proportional wenno patas ti panagngato ti pondo kadagiti mandatory services bayat a bumabbaba met ti porsiento para iti napateg a sector kas ti salun-at, edukasion,ken social welfare.
