LAOAG CITY – Kalikagum ti maysa a kompanya ti mangipatakder ti sabali manen a solar power plant iti Brgy. Paguludan iti ili ti Currimao.
Daytoy ket ti Nuevo solar power a maibilang a sister company ti Mirey Asia Corporation nga immunan a nagpatakder ti solar power plant iti nasao a lugar ken agpada nga adda iti babaen ti Vena Energy.
Segun iti nangibagi ti Nuevo solar, ipatakder da ti solar power plant a 30MegaWatts iti 36 nga ektarya iti uneg lote ti Mirey.
Immunan a dimmatag iti Sangguniang Panlalawigan ti nangbagi iti nasao a kompanya tapno ipakaammo da ti gagem da.
Inlawlawag ti kompanya dagiti benepisyo a mabalin da nga ipaay iti panangipatakder da ti solar power plant kas Corporate Social Responsibility ket ti scholarship, fire truck, ken dadduma pay para ti ili ti Currimao.
Nupay kasta, saan a nasungbatan amin ti nangibagi ti kompanya dagiti dadduma a saludsod dagiti kameng ti Sangguniang Panlalawigan maipanggep iti CSR rason nga inbalakad ni Vice Gov. Cecilia Araneta Marcos kas presiding officer a nasken a dumatag dagiti dadduma a mangimatmaton ti kompanya tapno masungbatan dagiti saludsod dagiti miembro ti junta probinsyal no manu ti kasapulan a maala nga agbalin nga scholar da ken dadduma pay.
Maituloy ti pannakatratar ti kalikagum ti nasao a kompanya iti sumaruno a regular session.
