LAOAG CITY – Inpakaammo ni Engr. Rommel Batuac chief operator ti National Irrigation Administration nga adda 37 a solar water pump projects a maipaima kadagiti mannalon ditoy probinsya.
Segun ken ni Batuac daytoy ket makatulong tapno mapangato ti irrigation development ditoy probinsya, nangruna iti mapaspasaran a kinatikag.
Kunana a ti 37 projects ket aggatad ti 300 a milyon a pisos.
Impakaammo ni Batuac a daytoy ket addaan ti dua a kategorya, daytoy ti “new area a mangpata-ud ti danom ken restored”, no sadinno nga addaan ti 17 a proyekto para iti new area ken 20 para iti restored projects.
Ti new area ket masapol tapno mainayon kadagiti addaanen iti irrigation canal na, bayat a ti restored ket ti kabaelan a mangterimaan kadagiti irrigation canal nga adda perdi na.
Mainaig iti daytoy, ket inbatad ni Batuac nga iti babaen daytoy a proyekto ket mapangato pay ti rice self sufficiency ditoy pagilyan.
Maitunos pay laeng daytoy ti inpamatmat ni Presidente Ferdinand R. Marcos Jr. a masapol ti ad-adu pay a solar-powered irrigation projects tapno mapadur-as ti produksion ti pagay iti pagilian.
Imbatad ti Presidente a ti panagusar ti solar energy ket makatulong iti ekonomia ken epektibo ti gastos gapu ta makatulong daytoy kadagiti mannalon a mangpadanum kadagiti talon da.
Kabayatanna, innayon ni Pres. Marcos a dagiti proyekto a solar-power irrigation, ket agserbi a kas solusion tapno mataming dagiti karit iti sektor ti agrikultura, agraman dagiti dakes nga epekto dagiti bagyo ken ti El Niño phenomenon.
