LAOAG CITY – Inpakaamo ni Brgy. Chairman Elmar Maulit, iti Barangay 49-B Raraburan ditoy siudad ti Laoag a dagus a narespondean ti kabarangayanda a nagpositibo iti Covid-19 wenno ti IN-C27.
Inbatad na nga apaman a naamoanna a nagpositibo iti kabarangayanna idi huebes ti rabii ket nagturong a dagus iti pagnanaedan ti pasyente ken inmandar na a saan a rumrumuar karaman dagiti kameng ti pamilya na.
Mainaig iti daytoy, kuna ni Maulit a binallaagan na dagiti residente iti sitio ni IN-C27 a saan pay laeng nga agruruar tapno maliklikan ti posible a panagwaras ti virus.
Innayun na nga iti laeng solar ni IN-C27 ti nakaipatungpalan ti lockdown ken maiyur-uray dagiti ipatunpal a pagannurutan ti city heath office para iti barangayda.
Kabayatanna, inpakaamo pay ti kapitan a nadeterminaren dagiti nakapulapol ni IN-C27 para iti contact tracing idinto a naipan isuna iti provincial isolation facility.
Ti IN-C27 ket lalaki nga agtawen ti 46, empleyado ti gobierno probinsyal, awanan ti travel history, nakapulapol na ni IN-C6 ken asymptomatic.
