LAOAG CITY – Inbatad ni Mr. Norman Bulosan, ti Presidente ti SULVEC SRIP Federated Irrigators Association iti ili ti Pasuquin nga ado dagiti maladingitan a miembro da gapu iti kinangina ti produkto a petrolyo.
Kuna na a gapu iti daytoy ket nagkiddaw da ti Solar Water Pump iti National Irrigation Association a dakkel ti maitulong na gapu ta mailibre da ti krudo.
Inrakurak na pay nga adda ti inpabulod ti National Irrigation Association kadakuada a Mobile Solar Water Pump no sadinno a kabaelan na a padanoman ti 3 nga ektarya.
Segun ken ni Bulosan, plano da pay ti agkiddaw ti nayon a Solar Water Pump ta dakkel ti maitulong na kadakuada.
Inlawlawag na a ti Solar Water Pump ket kabaelan na a padanuman amin dagiti mula da iti uneg ti 10 nga oras, saan a kas iti dati nga abuten ti agpatnag ti panagpadanom da.
Kabayatanna, inpakaammo na a gapu iti dakkel a nagngatoan ti presyo ti krudo ket adda dagiti nagmula ti high value crops kas ti lasona, mais ken balatong no sadinno a dagitoy a produkto ket ilako da idiay Cagayan.
Mainaig iti daytoy, gutgutiguten ni Bulosan dagiti pada na a mannalon nga ituloy da latta ti agmula kadagiti nagduduma a produkto nga isu ti kangrunaan a pagsapulan da, ken mangnamnama a dumteng to ti panawen a ngumina ti produkto da.
