LAOAG CITY – Naarestar ti maysa a kameng ti Philippine Army kalpasan a maipagarop a napan rimmaot ken binastos na dagiti kameng ti pulisya iti mismo nga Highway Police Assistance Desk (Hi-Pad) iti Brgy. 2 Anao iti ili ti Piddig, pasado alas-siete idi rabii.
Binigbig ni Police Capt. Kristoffer King Ramos, ti chief of police iti ili ti Piddig ti suspek a ni Jaylord Plaza y Duquez, agtawen ti 20, baro, kameng ti Philippine Army, residente iti Brgy Gayamat iti ili ti Piddig ngem nakadestino iti FSRR, Camp Tecson, San Miguel, Bulacan,
Inbatad ni Ramos a basar kadagiti nagbalin a biktima ni Plaza nga isuda Patrolman Richard Ramirez ken ni Patrolman Lucky Ver Manding, bigla lattan a napan ti suspek iti Hi-PAD a madlaw a nakaro ti bartek na ken inbaga na ti “ANIA KAYO, PULIS PATOLA?! PANG-LOCAL KAYO LAENG, SIAK KET PANG-NATIONAL, LETSE!”.
Gapu iti daytoy, inarestar a dagus dagiti dua a pulis ti suspek ken inkabil da iti kwerpo ti pulisya iti ili ti Piddig.
Malaksid iti ipila da a reklamo a Direct Assault Upon Agent of Person in Authority ket pilaan da pay ti suspek ti reklamo kriminal gapu iti panaglabsing na ti pagalagadan iti maipatpatungpal nga Enhanced Community Quarantine (ECQ) gapu iti Covid-19.
Innayon ni Ramos nga uray agkiddaw ti pammakawan ti suspek ket pilaan da latta ti reklamo gapu ta saan da a pilpilyen ti pilpilaan da ti reklamo.
Immunan a naamoan da Ramos nga immay laeng nagbakasyon ti suspek iti lugar da ken agsubli koma idi Marso 21 iti destino na ngem gapu ti ECQ ket saan a natuloy ken iyur-uray na pay laeng ti pammilin dagiti nangangato nga opisyal da.
Iti agdama, nagtalinaed ni Plaza iti kustodyar ti PNP iti ili ti Piddig.
