LAOAG CITY – Ginutigot ni Solicitor General Darlene Berberabe dagiti baro a Bar passers ti University of the Philippines College of Law nga agserbi iti gobyerno tapno tumulong iti agtultuloy a laban para iti panagsungbat ken panangipasubli dagiti pondo maipagarop a natakaw mainaig iti flood control corruption scandal.
Iti testimonial, kinablaawan ni Berberabe, a nagserbi kas dati a dean ti UP Law, dagiti baro nga abogado ken kinarit na dagitoy a biagen ti gagem ti pagadalan nga “honor, excellence, and service to the nation,” uray adda dagiti karit kas ti nababa a sweldo iti public sector.
Inrakurak na pay a silulukat ti Office of the Solicitor General iti panangala kadagiti ubbing nga abogado.
Iti agdama, ti Office of the Solicitor General ti counsel ti Anti-Money Laundering Council iti panag-secure ti freeze orders kontra kadagiti sanikua dagiti opisyal ken kontratista a karaman iti maipagarop nga anomalya iti flood control projects.
Maipalagip nga idi Setyembre 16, 2025, inaprubaran ti Court of Appeals ti freeze order iti nasurok a 100 a bank accounts ken insurance policies, nga addaan ti pakabuklan a balor nga umabot iti ₱20.3 bilyon, a mabalinen nga ipadalan iti babaen iti civil forfeiture tapno maisubli kadagiti umili ti pondo.
