LAOAG CITY – Inkari ni Solicitor General Menardo Guevarra ti naparpartak a legal action kontra ken ni suspended Bamban, Tarlac Mayor Alice Guo nangruna ket rumrummuar a maymaysa ti kontrobersial nga Alice Guo ken Guo Hua Ping.
Maipalagip a dagus nga inbatad ni Guevarra a mangipilada ti Qou Warranto petition kontra ken ni Guo, kagiddan metten ti immuna a rakurak ni Sen. Risa Hontiveros a kinumpirmaran ti National Bureau of Investigation ti agpada nga identity da Alice Gou ken Guo Hua Ping.
Inbatadna a no maipangabak ti Office of the Solicitor General ti kaso ket mapadisi iti puesto ni Guo ken saanen a mapalubusan pay nga agpaidasig daytoy iti aniaman a public office.
Immuna iti daytoy, inbutaktak ni Sen. Risa Hontiveros ti nagbalin a kumpirmasion ti National Bureau of Investigation nga agpada dagiti fingerprints da Alice Guo ken Guo Hua Ping.
Kabayatanna, naammoan a pudno a ni Alice ket agpampammarang kas maysa a Pilipino tapno idauloan dagiti sumagmamano a krimen nga ilemlemmeng iti operasion dagiti Philippine Offshore Gaming Operator.
