LAOAG CITY – Saan nga agresign ni Solicitor General Menardo Guevarra iti posisyon na kalpasan a nagkedked a mangibagi kadagiti opisyal ti gobyerno a mangkwesk-kwestyunar kadagiti petisyon a naipila iti Korte Suprema mainaig iti pannakaarestar ni dati a Presidente Rodrigo Duterte.
Iti maysa nga statement, inbatad ti solicitor general a saan nga agresign kagiddan ti panangipetteng na a ti posisyon ti Office of the Solicitor General ket maysa a pro-republic.
Nupay kasta, inpetteng ti opisyal nga itultuloy na ti agserbi ken ni laeng Presidente Ferdinand Marcos Jr.ti mabalin a mangikkat kenkuana iti pwesto.
Immunan nga inpetteng ti Office of the Solicitor General a ti International Criminal Court ket awan ti hurisdiksyon na iti Pilipinas gapu ta maipatpatungpal ti judicial system ti pagilian.
Iti baet daytoy, nagtalinaed ti takder ni Presidente Marcos a ti pannakaarestar ni dati a Presidente Duterte ket maiyataday iti commitment ti Pilipinas iti Interpol.
Immuna iti daytoy, nagpanawagan ti Malacañang ken ni Solicitor General Guevarra a tingitingen na ti bukod na a bagi no rebbeng nga agtalinaed daytoy kas solicitor general iti pagilian kalpasan ti inaramid na.
