LAOAG CITY – Inpetteng ni House Deputy Majority Leader ken ACT-CIS Partylist Rep. Erwin Tulfo a kasapulan a marebisar ti Solo Parent Law wenno ti Republic Act 11861.
Daytoy ket tapno masolbar dagiti parikut iti pannakaipatungpal ti linteg tapno masigurado a maipaay dagiti mandated benefits para kadagiti solo parents.
Namunganay daytoy kalpasan ti reklamo a kurang ken delayed a pannakaited ti P1,000 monthly allowance kadagiti solo parents, agraman ti saan a maipatpatungpal a discount da kadagiti grocery items.
Iti agdama, ti implementasyon ti nasao a linteg ket nakapaima kadagiti city ken Municipal government ngem segun ken ni Tulfo, saan nga ammo dagiti dadduma a Local Government Units (LGUs) no pangalaan ti pondo para kadagiti solo parents.
Gapu iti daytoy, itantandudo ni Congressman Erwin Tulfo nga alaen manipud iti gobierno nasional ti pondo tapno maipaay ti umno nga allowance dagiti nakurapay a solo parents.
