LAOAG CITY – Naipan iti total lockdown ti Solsona Municipal Police Station kalpasan a nagpositibo iti covid-19 ti maysa a pulis.
Daytoy ti inpakaammo ni Patrolman Lloyd Vizor iti nasao nga ili.
Inlawlawag ni Vizor ti nagpositibo iti covid-19 ket nakarikna ti panagsakit iti bagbagi.
Kuna na a gapu iti daytoy ket napan nagpacheck-up ti pulis iti rural health unit ken dimmalan ti RT-PCR test ket positibo ti resulta daytoy.
Inpakaammo na a kas protocol ket mandatory a dumalan iti swab test ti 20 a kameng ti nailian a pulisia pakairamanan ti hepe a ni PLt. Belen Baoit ken dagiti lima a balod.
Mainaig iti daytoy, kuna ni Vizor nga addan ti naiyestablisar a barikada ken yellow lane iti aglawlaw ti Solsona Municipal Police Station.
Innayun na dagiti pay laeng kameng ti 2nd Regional Mobile Force Batallion ti temporario a mangiwanwan iti Solsona bayat a nakaisolate ti kapulisan.
Kabayatanna, kuna ni Vozor nga iti agdama ket saan pay a masinunuo ti nakaalan ti maseknan a pulis iti makapatay a virus.