LAOAG CITY – Inleppasen dagiti tropa ti gobierno iti Somalia ti nadara a 24-hour siege babaen ti Islamist fighters a rimmaot iti natalak nga hotel iti ciudad ti Beledweyne.
Ti panagatake ti al-Shabab ket nangrugi iti pannakapabettak ti maysa a lugan, kalpasan na ket sinerreken dagiti armado a grupo ti hotel a nagtungpal iti rinnupak iti nagbaetan da iti security forces.
Basar iti report, adda ti pito nga indibidual a natay iti napasamak a panagatake, ngem kuna dagiti nakaimatang iti insidente ket possible nga ad-ado pay ti bilang dagiti pimmusay.
Naamoan a na-neutralize dagiti tropa ti gobierno dagiti dadduma a suspek idinto nga adda dagiti nangpabettak ti bukod na a bagi tapno saan a makemmeg a sibibiag.
