LAOAG CITY – Naminsan manen a naitantan iti pannakaiwayat ti State of the Provincial Address ni Gov. Matthew Marcos Manotoc a naituding a maiyat inton bigat ti Oktubre 3, 2024.
Daytoy ti inpakaammo ni Mr. Gervy James Gumarit, mangidadaulo ti Provincial Communications and Media Office.
Inbatadna a daytoy ti nagbalin a desision ti gobierno probinsial kalpasan a maobserbaranda a saan pay a naananay a nakarekobre dagiti residente ditoy probinsia gapu iti iduduprak ti Bagyo Julian.
Kunana nga iti agdama ket kalikagum ti gobierno probinsial a tumutok iti relief operation wenno pannakaipaay ti tulong kadagiti residente ditoy probisnia.
Inpettengna a naiyakar ti pannakaiwayat ti State of the Provincial Address inton Martes iti Oktubre 8, 2024.
Maipagalip nga immunan a naitantan ti pannakaiwayat ti State of the Provincial Address idi Seteimbre 30 gubuay ti Bagyo Julian.
Kabayatanna, inpaganetget ni Gumarit a naisaganada aminen a kasapulan no maipanggep iti nadakamat nga aktibidad.
