LAOAG CITY – Nagpasar ti nakaro a perdisyon ti Soroka hospital iti Beersheba iti southern Israel kalpasan a natamaan ti naruay a missiles nga inpabanto ti Iran iti nagpatnag.
Basar iti Israel emergency service, umabot iti agarop 65 a tattao ti nasugatan iti insidente.
Mainaig iti daytoy, inrakurak ti Iranian state media a dagiti missile strike ket pinuntirya na ti military site nga adda iti asideg ti ospital.
Immunan nga inpalgak ti Israeli military a pinuntirya da ti nuclear sites karaman ti saan nga aktibo nga Arak heavy water reactor ken ti Natanz facility.
Gapu iti napasamak ket ikonkonsiderar ni US presidente Donald Trump ti posibilidad nga ibilin na ti pannakipaset ti Amerika iti kampanya ti Israel.
Maipalagip nga immunan a naireport nga inaprubaran ni Trump ti plano a panangraot iti Iran, ngem agpapan ita ket awan pay ti pinal a desisyon seknan iti daytoy.
Nagballaag met ti Iranian Supreme Leader iti “irreparable harm” no makiballaet ti Estados Unidos.
