LAOAG CITY – Ginutigot ti South Africa ti International Court of Justice a mandaren ti Israel nga isardengna ti panangraut iti Rafah City.
Paset daytoy ti panawagan ti South Africa kalpasan nga akusaranda ti Israel ti genocide kontra iti Palestine.
Kiniddaw met ti South Africa ti nayon nga emergency measures iti opensiba daytoy iti Rafah City ti lugar iti Gaza Strip no sadino nagturungan dagiti nagibakwit a nasurok maysa a milyon a Palestino sipod idi pinaigetan ti Israel military operations-da.
Inpetteng ti South Africa a dagiti Palestino ket awanen ti sabali a pagturunganda a lugar no bilang naan-anayen a nadadael ti Israel ti Rafah City.
Maipalagip nga idi pay Enero ket nangipila ti kaso ti South Africa iti International Court of Justice gapu iti genocide nga inaramid ti Israel kadagiti Palestino nga adda iti Gaza.
Immunan nga inrakurak ti Israel nga awan ti pangibasaran ti akusasion ti South Africa a maipagarup a linabsingda ti 1949 Genocide Convention.
