LAOAG CITY – Nagpanawagan ti South African women’s rights groups para iti purple protest kontra iti gender-based violence a maideklarar kas national disaster iti pagilian kalpasan nga agbalbalin a gagangay ti panangatake kadagiti babbai.
Nangrugi ti kampania iti maysa a tignay ti viral social media kagiddan ti mapaspasangasangan a G20 Summit iti Johannesburg.
Nangipeksa dagiti celebrities, residente ken dadduma pay a pagilian ti gagemda babaen ti panangbalbaliw kadagiti profile pictures dagiti social media accounts-da iti purple a maysa a kulay a masansan a maus-usar iti gender-based violence awareness.
Basar iti United Nations Women, maibilang a world’s highest levels ti gender-based violence ti kapadasan ti South Africa nga adda dagiti babbai a napapatay iti namin-lima a daras a nangatngato ngem iti global average.
Naammoan nga iti nagbaetan ti Enero ken Marso ita a tawen, 137 a babbai ti napapatay ken sumurok 1,000 ti narames basar iti South African crime statistics.
Inorganisar ti Women for Change ti nasao a protesta a nangitandudo ti G20 Women’s Shutdown ken indauloanda pay ti online campaign.
Mainaig iti daytoy, saan a pinatgan ti National Disaster Management Centre ti panawagan a maideklarar ti gender-based violence kas national disaster gapu ta awan ti pangibasaran iti legal requirements.
Kabayatanna, inpakaammo ni President Cyril Ramaphosa iti G20 Social Summit a ti South Africa ket indeklararnan ti gender-based violence ken femicide kas national crisis idi 2019.
