LAOAG CITY – Agar-aramid dagiti otoridad idiay South Korea ti mobile app para kadagiti biktima ti panag-stalk tapno maamoan ti eksakto nga oras ken lokasyon dagiti stalkers no asideg dagitoy.
Ti nasao nga app nga inwaragawag ti justice ministry ti South Korea ket paset ti naaprubaran a pannakaamendar ti electronic monitoring law ti nadakamat a pagilian.
Maipalagip a nagbalin a public concern iti South Korea dagiti stalkers, aglalo ket dagiti high-profile crimes mainaig iti panag-stalk ket nagbalbalin nga headlines kadagiti naglabas a tawen.
Iti babaen ti agdama a linteg, dagiti biktima ti panag-stalk ket makaawat ti text message alerts no adda dagiti stalkers iti asideg da, ngem saanna a mabalin nga ibaga ti eksakto a lokasyon da.
Nupay kasta, iti naamendaran a linteg ket mapalubusan dagiti biktima a makita ken maamoan ti lokasyon ti stalker da babaen iti mapa iti cellphone.
