LAOAG CITY – Inrakurak ti South Korea nga amin nga erupuerto iti pagilian ket kasapulan a mainstolaran ti bird detection cameras ken radars kalpasan ti Jeju Air Crush a nakatayan ti 179 a tattao.
Maipalagip a ti Boeing 737-800 ket aggapo iti Thailand ken agturong iti Muan airport ti South Korea idi naidungpar iti pader ti erupuerto a nangitunda ti napasamak a panagbettak.
Kas solusyon iti pakasaritan a trahedya iti pagilian ket nangipatungpal ti gobierno ti South Korea ti addang tapno mapagtalinaed ti kinatalged dagiti biyahero ket maipasigurado nga amin nga erupuerto ket maaddaan ti saan a nababbaba iti maysa a thermal imaging camera kas paset iti isaysayangkat da nga inspeksyon kagiddan ti naiget a panangtingiting kadagiti pasilidad a masansan a pagturturungan dagiti tumatayab.
Mainaig iti daytoy, kalikagom pay ti gobierno ti South Korea a maaddaan kadagiti mobile sonic devices tapno maestablisar ti kadakkel ti tumatayab bayat a dagiti bird detection radars ket maikabil met amin kadagiti erupuerto.
Daytoy ti nagbalin nga addang ti gobierno ti South Korea kalpasan a nadeterminar dagiti otoridad a ti makaigapu iti insidente ket gapu iti nabirukan a dotdot ken payyak ti tumatayab iti makina ti Jeju Air flight.
