LAOAG CITY – Mangiyuswat ti South Korea ti loudspeaker broadcasts a maiturong iti North Korea.
Inbatad ti National Security Council nga aramiden daytoy ti South Korea kalpasan a nangipatulod manen ti Pyongyang kadagiti lobo iti border da a naglaon iti basura.
Nagballaag ti South Korea nga usaren da ti “unendurable” measures kontra iti North Korea para iti panagipatulod da kadagiti lobo.
Rinugyan ti Pyongyang ti nagipatulod kadagiti lobo nga ayan ti ado a basura ken rugit iti border idi Mayo ken inpetteng na a ti inaramid da ket panagibales da laeng kadagiti leaflets nga anti-North Korea nga inpatulod dagiti aktibista manipod iti South kas paset ti maysa a propaganda campaign.
Idi Hunyo 2, inbatad ti Pyongyang a temporaryo nga isardeng da ti agipatulod kadgaiti lobo gapu ta ti 15 a tonelada a basura a naipatulod dan ket umdasen tapno idanun ti mensahe da no kasanu ti gurada iti anti-North leaflets.
Nupay kasta, inkari ti komunista a pagilian nga itultuloy da ti agipatulod kadagiti lobo no maulit manen dagiti leaflets manipod iti South iti babaen ti panagipatulod da iti ado a basura.
Naamoan a dagiti broadcast ti South Korea ket maiparuk-at manipod iti ado a loudspeaker a nakatambak iti dadakkel a rack kagiddan dagiti damdamag iti intero a lubong ken impormasyon maipanggep iti demokratiko ken kapitalista a kagimongan a mabulunan ti popular K-pop music.
Mapapati a ti aweng ket umabot iti nasurok a 20 a kilometro wenno 12.4 a milya agturong iti North Korea.
