LAOAG CITY – Nagpanawagan ti South Korea a pumanaw a dagus dagiti tropa ti North Korea a maipagarop a naka-deploy iti Russia ken maus-usar iti giyera ti Russia kontra iti Ukraine.
Segun iti National Intelligence Service, ti spy agency ti South Korea, nakumpirmaran na a nangipatulod ti North Korea ti pakabuklan a 1,500 special operation forces iti Russia.
Naamoan a dagiti nasao a soldado ket nagturong iti Russia tapno tumulong iti agtultuloy a giyera kontra iti Ukraine.
Pinaawagan metten ti South Korean government ti Russian Ambassador a nakabase iti Seoul, tapno iprotesta ti inarmid ti komunista a pagilian.
Iti panagsango da Vice South Korean Foreign Minister Kim Hong Kyun ken Russian Ambassador Georgy Zinoviev, kinundenar ni Kim ti inaramid ti North Korea nga ibilang na a mangitunda ti pangta iti South Korea ken iti international community.
Inpetteng ni Kim, aramiden ti pagilian da ti amin kas sungbat iti nagbalin nga addang ti North Korea no sadinno pangta iti national security ken ti national interest ti South Korea.
Sakbay iti daytoy ket immunan nga inrakurak ni Ukrainian President Volodymyr Zelenskyy a naestablisar dagiti intel officer ti Ukraine ti mapatta-patta a 10,000 a North Korean soldiers a nakasagana a makikappeng iti Russian forces iti agtultuloy a pannakigubat da iti Ukraine.
