LAOAG CITY – Nakaalerto ita ti South Korea no bilang agibelleng ken mangipatulod manen ti lobo a naglaon ti basura, toilet paper ken rugit ti ayup ti North Korea iti teritorio ti South Korea.
Daytoy ti inrakurak ti military ti South Korea gapu ta adda ti posibilidad a mapasamak manen daytoy inton sumaruno a lawas kas panangsungbat iti panangpatayab met ti South Korean activists a propaganda balloon.
Ti nasao a pinatayab a lobo ti aktibista a “Fighters for North Korea” ket naglaon ti 200,000 Pyongyang leaflets nga agpapada nga anti-Kim Jong Un, 100 radios ken USB flash drives a naglaon ti speech ti South Korean President Yoon Suk Yeol ken pakairamanan dagiti nagduduma a kpop music.
Inwayat dagiti nadakamat nga aktibista daytoy kas subbot gapu ta idi napalabas a lawas ket nagibelleng ti North Korea ti saan a bumaba iti 600 a trash-filled balloons ken sumagmamano nga unidentified objects.
Basar iti military ti South Korea, ibilangda daytoy kas low class action ngem iti baet daytoy para ken ni South Korea activist leader a ni Jang Se-yul ket maipagarup a saan nga agsardeng ti kampaniada nupay mangipatulod met ni Kim Jong Un dagiti basura.
