LAOAG CITY – Suportaran ti Ministry of Environment ti South Korea babaen iti K Water Project dagitoy ti proyekto ti Philippine Atmospheric, Geophysical and Astronomical Services Administration wenno PAG-ASA.
Segun ken ni Mr. Marcell Tabije, local disaster risk reduction management officer ti gobierno probinsial, daytoy ti kangrunaan nga impadanon dagiti opisial ti nadakamat a pagilian iti panag-courtesy call da ken ni Gob. Matthew Marcos Manotoc.
Inlawlawagna a nabigbig ti grupo dagiti opisial ti South Korea ti Laoag River Basin wenno ti karayan padsan a pakaiplastaran ti “Artificial Intelligence Base Flood Forecasting Early Warning System”.
Impalgakna a dinakamat dagiti maseknan ti pakaseknan ti nasao a proyekto ken dagiti ili a madalanan ti nasao a proyekto.
Kuna ni Tabije a mangrugi ti nasao a proyekto ita a tawen 2023 ken agpatingga intono tawen 2025.
Mainaig iti daytoy, imbatadna a mapan kitaen ti nasao a grupo ti lugar a mabalin a pakaipanan dagiti instrument a mangpakaammo kadagiti kakailian iti kaadu ti “volume” ti danum no agtudo.
Inbunannagna nga ipakita ti instrumento ti “rain gauge” a pakakitaan ti kaadalem ti danum ken adda ti “alarm system” na a kaipapananna a no mangngeg ti kaadda ti alarma kaipapananna a nasken nga agsaganan dagiti agindeg kadagiti nababa a lugar wenno dagiti alisto a malayus a lugar.
Segun kenkuana, babaen iti daytoy ket makapagbakwit a nasapsapa dagiti kakailian.
Inlawlawag ni Tabije a nakapagtataripnongdan kadagiti MDRRMO manipud kadagiti sangapulo ket maysa nga ili a madalanan ti nasao a proyekto pakaseknan daytoy a banag.
Innayonna a sangsangkamaysa ti apelada kadagiti kakailian ti itutulong dagitoy a mangsaluad kadagiti maiplastar a kagamitan iti karayan.
