LAOAG CITY – Inarestar dagiti imbestigador ti South Korea ti napadisi a ni President Yoon Suk-yeol ti South Korea gapu kadagiti pammabasol nga insurrection gapu iti apagbiit a panangipakatna iti martial law iti tignay a napaspas a binaliktad ti National Assembly ti pagilian.
Iti prerecorded video message a nairuar kalpasan ti pannakaarestarna, inbatad ni Yoon nga inaramidna ti desision nga agpasakup iti panagsaludsod gapu iti napaay a martial law bid-na tapno maliklikan ti “bloodshed.”
Nagusar dagiti imbestigador ken pulis ti South Korea kadagiti agdan a sumang-at iti residensial compound ni Yoon kalpasan nga idi damo ket linapdan isuda ti Presidential Security Service a nangbarikada iti pagserkan babaen ti panangusar kadagiti lugan.
Naguummong dagiti rinibu a tattao pakairamanan dagiti supporters iti ruar ti pagtaengan ni Yoon idinto ti maysa a grupo dagiti agpanpanday linteg manipud iti agturturay a konserbatibo a People Power Party ken dagiti abugado ni Yoon ti nangpadas met a manglapped iti pannakaarestar iti uneg ti residential compound.
