LAOAG CITY – Mangyeg ti Southwest Monsoon wenno Habagat iti naulep a tangatang ken mawars-waras a tudo iti Luzon ita a Biernes, segun iti PAGASA.
Agtultuloy ti panangmonitor ti state weather bureau iti LPA 08f, a dati bagyong Neneng, ken LPA 08h iti ruar ti Philippine Area of Responsibility (PAR).
Agpada nga addaan iti kalalainganna a gundaway a kumaro manen nga agbalin a tropikal a depression iti uneg ti 24 nga oras.
Kabayatanna, adda met ti Severe Tropical Storm Saudel iti ruar ti PAR, a masarakan iti 2,735 kilometro iti daya ti Eastern Visayas.
Daytoy ket addaan iti maximum sustained winds a 95 kilometro iti kada oras ken gustiness nga agingga iti 115 kilometro iti kada oras. Aggargaraw daytoy nga agpaamianan a laud iti kapartak a 25 kilometro iti kada oras.
Mapadasan dagiti probinsia ti Ilocos Norte, Ilocos Sur, Apayao, Abra, Batanes ken Cagayan ti naulep a tangatang nga addaan iti mawaraswaras a tudo ken gurruod gapu iti Southwest Monsoon.
Posible ti flash flood ken panagreggaay ti daga gapu iti kalalainganna agingga iti sagpaminsan a napigsa a tudo.
Iti Metro Manila ken dadduma pay a paset ti Luzon, mapapati a naulep a tangatang nga addaan iti mawaraswaras a panagtudo wenno panaggurruod.
Iti dadduma pay a paset ti pagilian, mabalin met a malapasar ti panagtudo wenno panaggurruod gapu iti localized thunderstorms.
