LAOAG CITY – Kalikagum ti Sangguniang Panlungsod a makompleto dagiti concrete barrier iti Gilbert bridge ditoy siudad ti Laoag.
Daytoy ti naragsak nga inpakaamo ni Sangguniang Panlungsod Member Derick Lao bayat iti isasangpet dagiti kanayonan concrete barrier ditoy siudad.
Segun kenkuana, napinpintas a kitkitaen dagiti nakaikabil a barrier iti paset iti Gilbert bridge partikular iti agturong iti ili ti San Nicolas, nangruna iti rabii.
Nagyaman ni Lao iti 1st District Engineering Office nga idadaulwan ni Engr. Glen Miguel ken ni Engr. Bobby Rabago nga iso ti kinasarita mainaig iti daytoy a banag.
Maipalagip a maysa kadagiti kalikagum ni Lao ket ti pannakasukat dagiti barikada iti paset ti rangtay partikular iti agturong iti ili ti San Nicolas, gapu ta patienna a mangitunda daytoy ti desgrasya .
Kabayatanna, namnamaenna nga amin a barikada ket masukatan ti concrete barrier sakbay nga agundo ti bulan ti Desiembre.
