LAOAG CITY – Kalikagum ti Sangguniang Panlungsod ditoy siudad ti Laoag nga adda ti mai-deploy a kameng ti polisia nga agbantay kadagiti galyera ditoy probinsia.
Daytoy a resolusion ket ket intandudo ni Sangguniang Panglungsod Member Jason Perera ken inaprobaran ti konseho a mangkidkiddaw ken ni P/Cl Frederick Obar, Provincial Director ti Ilocos Norte Police Provincial Office ken ni Gov. Matthew Marcos Manotoc a mai-deploy dagiti kameng ti Philiipine National Police kadagiti nasao a lugar.
Kinuanana a parte iti lokal a gobierno a siguraduen ti kinatalged dagiti umili, kas ti peace and order chairman ken kameng ti peace and order council.
Segun kenkunana, naobserbaran na nga ado kadagiti kaso a pammatay ket asideg iti cockpit arena kas iti napasamak a pammaltog iti San Nicolas.
Innayonna a maibilang kas tourist attraction ti galyera gapu ta adda iti presidential decree nga inaramid ti dati a Presidente Ferdinand Marcos Sr. a nangipaulog a legal ti cockfighting arena kas paset ti tradision ken kultura dagiti Pilipino.
Kabayatanna, panggep daytoy nga addang a mapagtalinaed ti linak, urnos ken talna ditoy probinsia.
