LAOAG CITY – Inpayaan ti Sang Panlungsod ditoy ciudad ti Laoag iti sertipikasyon a mangbigbig kadagiti agad-adal iti Shamrock Elementary School gapo iti pammadayaw a nagund-od da kabayatan ti Guangdong Hongkong Macao Greater bay Area International Mathematical Olympiad-final round.
Segun iti konseho, ti nasao a kompetisyon ket naiwayat idi Marso 15-16 idiay Hongkong a nakipagpasetan dagiti estudyante manipod iti nagduduma a pagilyan.
Inbatad ti konseho a nailanad iti paglintegan iti pagilian a no adda dagiti estudyante a makagun-od ti pammadayaw manipod kadagiti pakisalipan da a nagduduma a kompetisyon ket rumbeng a maipaayan ti pammigbig tapno ad-addo a maipaayan ti motibasyon dagiti dadduma nga indibidual a mangipaay met ti pammadayaw para iti pagilian.
Kabayatan ti pasalip iti Primary 3 category, nagun-od ni CRIZEN ZHIAN P. DULDULAO ti 1st prize idinto a ni KHLOE CASSIDY G. IGNACIO ket naiyalat na met ti 3rd prize.
Iti Primary 6 category, nagun-od ni LUIZ ACHILLES D. LAZO ti 2nd prize idinto nga agpada da UM ATHENA R. AQUINO ken ZABREENAH FAE A. TAPEC a nakaiyawid ti 3rd prize.
Ti Guangdong Hongkong Macao Greater bay Area International Mathematical Olympiad ket maysa a kompetisyon a mangkita ti kinalaing dagiti estudyante iti matematika ken iti international skills.
