LAOAG CITY – Mangipatulod ti surat ti Sangguniang Panlungsod kadagiti Kapitan ditoy siudad ti Laoag a maipagarup a nangbutbuteng kadagiti tricycle driver a simmurot iti motorcade ti maysa a kandidato ditoy siudad ti Laoag.
Segun iti Presiding Officer, dagitoy a Kapitan ket maipagarup a binutbutengda a maikkat ti prangkisa dagiti tricycle driver gapu ta simmurotda iti motorcade iti maysa a kandidato.
Inbatadna a saan a nainkalintegan ti inaramid dagiti nasao a Kapitan gapu ta ti laeng konseho ti adda ti karbenganna a mangibabawi kadagiti prangkisa a naited kadagiti tricycle driver.
Inlawlawagna a ti konseho ti mangaprobar ti prangkisa dagiti tricycle driver ken awan ti nakailanad a paggunurotan a maipawil ti sumuporta kadagiti kandidato a kalikagumda a suportaran.
Kabayatanna, binalakadan ti Presiding Officer dagiti Kapitan a kitaenda a naimbag dagiti ibagbagada gapu ta kaasi met dagiti tricycle driver a makaaw-awat ti pammutbuteng kadakuada.
