LAOAG CITY – Inluges-luges ti Spain ti kinalaban na a Costa Rica gapu ti 7-0 a resulta iti group stage ken maibilang a kadakkelan a napuntos iti FIFA World Cup ita a tawen.
Daytoy ket gapu ta agarup isu amin a gundaway ket kukua ti Spain ti bola agingga a nagngudo ti ay-ayam wenno 82% ball possession ken 93% passing accuracy.
Immuna a nakapuntos ni Striker Dani Olmo iti Spain iti maika-11 a minoto ti ay-ayam, napasarunuan babaen kenni Striker Marco Asensio iti maika-21 a minoto ken iti maikatlo a puntos ket naaramid ni Striker Ferran Torres iti maika-31 a minotos nga addaan iti sag-10 a minotos a baetan ti panagpuntos dagitoy.
Iti Second half, nakaipastrek manen ni Torres iti maikapat a goal iti maika-54 a minotos, naiyalat ti maika-lima a puntos babaen kenni Midfielder Gavi iti maika-74 a minotos, iti maikanem a goal ket naaramid ni Midfielder Carlos Soler iti maika-90 a minotos ken iti maikapito a goal ket naaramid ni Striker Alvaro Morata iti maika-90 ken dua a minoto nga extension iti ay-ayam.
Maysa a rason iti adu a napuntos ti Espanya ket iti dekalidad a passing masterclass iti damo a panagay-ayam da.
Manamnama nga agsango ti Spain ken Germany intono Lunes.
