LAOAG CITY – Kinanselar ni House Speaker Bojie Dy ti travel clearance ni Ako Bicol Partylist Representative Zaldy Co ken naikkan ti 10 nga aldaw tapno asgubli iti Pilipinas.
Daytoy ket tapno masungbatan ni Co dagiti akusasyon kontra kenkuana mainaig iti anomalya a flood control projects.
Mangnamnama ni Dy a sumurot ni Co iti pammilin na nangruna ket kasapulan ti pisikal a pannakipaset ni Co kadagiti imbestigasyon ken panagdengngeg mainaig iti nasao nga isyu.
Kageddan iti daytoy, naballaag ni Speaker Bojie a mabalinda a mangipatungpal iti panangdisiplina ken ligal nga aksyon kenni Co no saan a sumurot iti mandar na.
Maipalagip nga inrekomendar ni Navotas City Representative Toby Tiangco kenni Dy nga adalen na ti pudno a medical condition ni Ako Bicol Party-list Representative Zaldy Co.
Kuna ni Tiangco a kasapulan a makiddaw ti medical certificate ni Co tapno maamoan no ti sakit na ket life-threatening.
Inbatad na a no saan met unay a narisgo ti kasasaad ti salun-at ni Co ket awan ti rason tapno saan nga agawid daytoy iti Pilipinas.
Kabayatanna, pagaw-awiden pay ni House Majority Leader Sandro Marcos ni Co tapno sangwen dagiti akusasyon.
