LAOAG CITY -Inpaganetget ni Speaker Faustino “Bojie” G. Dy III, a masapol a maprotehiran ti Sierra Madre Mountain Range kas kangrunaan a depensa kontra iti nakaro a panaglayos ken bagyo iti Metro Manila ken dagiti kaparanget a probinsya.
Kagiddan iti daytoy, nagtataripnong manen ti technical working group ti Kamara de representantes tapno trataren ti House Bill No. 3538, a gagem na a buklen ti Sierra Madre Mountain Range Authority (SMMRA).
Iti babaen ti gakat, agaramid ti maysa a 25-year blueprint wenno master plan nga agusar ti siyentipiko a wagas para iti konserbasyon ken proteksyon ti kaatiddogan a kabanbantayan iti pagilian.
Segun ken ni Speaker Dy, saan nga umdas dagiti imprastraktura wenno flood control lamang, no di ket masapol a salwadan dagiti kabanbantayan ken watershed a mangsagepsep ti tudo.
Innayon na a kagiddan ti panangprotehir iti aglawlaw ket masapol nga ipaayan ti naurnus a pagbiagan dagiti pamilya nga agnanaed iti lawlaw na tapno agbalin dagitoy a katulungan iti panangsalwad iti Sierra Madre.
Ti pannakabukel ti Sierra Madre Mountain Range Authority ket karaman iti agdama dagiti priority measure ti Legislative-Executive Development Advisory Council (LEDAC).
