LAOAG CITY – Inikkan ni House Speaker Faustino “Bojie” G. Dy III ni Ako Bicol Party-list Rep. Zaldy Co ti agingga inton Lunes, Septiembre 29, 2025 tapno agsubli ditoy Pilipinas ken sangoen dagiti alegasion kontra kenkuana.
Nakailanad daytoy iti surat ni Dy ken ni Co no sadinno nga inpettengna a no saan a sumurot ni Co ket mangipakita a saanna a kayat a maipadalan kadagiti proseso nga ikedkeddeng ti linteg rason a mangipatungpal ti Kamara ti maiyannatop a disciplinary ken legal actions kontra kenkuana.
Sungbat daytoy ni Dy iti surat kenkuana ni Co a naipasa iti House Committee on Ethics no sadinno nga adda met ti sangsangoen daytoy a reklamo.
Nagkari ni Dy a no agsubli ditoy pagilian ni Co ket makikoordinar ti Kamara kadagiti otoridad para iti kinatalgedna ken ti pamiliana.
Inpetteng ni Dy a ti panangibabawi iti travel clearance ni Co ket nasken a saan nga ibilang a nasapa a panagdesision no diket panangipaay ti gundaway a sangoenna iti proper forum dagiti pammabasol kontra kenkuana.
