LAOAG CITY – Inpanakkel ni House Speaker Faustino “Bojie” Dy III a nakaipasa ti Kamara de representantes ti 17 manipod iti 52 a prayoridad a nailungalong a gakat ti Legislative-Executive Development Advisory Council (LEDAC) iti baet ti kumarkaro a karit para iti ekonomiya ken dadduma pay a problema ti pagilian.
Iti panagbitla ni Dy sakbay a nag-adjourn ti Kongreso para iti Holy Week break, dinayaw na ti kolektibo a panangikarkarigatan dagiti agpanpanday linteg, iti panangidaulo ti kamara de representantes ken ni Majority Leader Ferdinand Alexander “Sandro” A. Marcos, iti panangpatalinaed ti legislative momentum.
Segun ken ni Dy, dimteng dagiti balligi iti panawen nga adda ti dakkel a global uncertainty, aglalo iti epekto ti tensyon iti Middle East a nangipangato ti presyo ti langis, dagiti magatgatang ken nakaapektar iti kinatalged ti ekonomiya ken pagbiagan dagiti Pilipino.
Inlungalong pay ti Kamara de representantes ti napapateg a reporma iti edukasyon, karaman ti pannakaamendar ti Universal Access to Quality Tertiary Education Act ken ti pannakapapigsa ti Presidential Merit Scholarship Program tapno masuportaran dagiti estudyante ken maisagana dagitoy iti panagtrabaho da.
Naipasa pay ti Digital Payments Act a gagem na a mapaalisto ti digitalisasyon iti gobierno, makissayan ti red tape, ken maipangato ti transparency kadagiti transaksyon ti gobyerno.
