LAOAG CITY – Nagpanawagan ni House Speaker Faustino “Bojie” Dy III kadagiti amin nga opisial ti barangay iti intero a pagilian a makikaysa iti gobierno iti laban kontra iti korapsion iti babaen ti panagbalin a nasipot iti pannakaipatungpal kadagiti proyekto iti bukud dagitoy a komunidad.
Iti panagbitlana iti Liga ng mga Barangay Congress a naisayangkat iti World Trade Center, inpetteng ni Speaker Dy a ti panangipasa ti silulukat ken napudno a nailian a pundo ket umuna nga addang laeng iti nalawlawa a kampania kontra iti maanomalya.
Inbatad ni Dy a kas maysa a lider a nangrugi ti karera iti barangay level iti probinsia ti Isabela, inikkanna ti pateg ti papel dagiti lokal nga opisial iti panangbantay iti aktual nga implementasion dagiti proyekto kalpasan a maaprobaran ti nailian a pundo.
Ginutigotna dagiti opisial ti barangay nga aktibo nga ammoen no ania dagiti proyekto ti ipatungpal ti Department of Public Works and Highways (DPWH) iti sakupenda a lugar.
Innayonna nga iti babaen ti aktibo a koordinasion iti Department of Public Works and Highways district offices, al-alisto a mabantayan dagiti lider ti barangay ti kalidad ken panangsurot dagiti proyekto iti naikeddeng a plano.
