LAOAG CITY – Kinablaawan a dagus ni Speaker Martin Romualdez ni Senator Chiz Escudero kalpasan a naelektaran kas baro a Senate president kasukat ni Senador Migz Zubiri a bimmaba iti pwesto idi kalman.
Kagiddan iti daytoy, nagyaman ni Romualdez iti liderato ni Zubiri a kinabaelan na a pagmaymaysaen ti dua a kongreso ken ti saan a magatadan a serbisyo iti panangidaulo na iti senado.
Iti deskripsyon met ti house speaker ken ni Escudero, kuna na a maysa a respetado a tao iti lubong ti pulitika, mabigbig iti edukasyon na, addan ti integridad ken commitment iti amin a pilipino.
Mangnamnama ni Romualdez nga agbalin a nabunga ti baro a partnership iti nagbaetan ti Senado ken kamara de representantes.
Iti agdama a sumangsango iti nagduduma a karit ti Pilipinas, oportunidad ti pagilian iti babaen ti panagkaykaysa ket epektibo a masolusyunan ken napintas ti masakbayan dagiti Pilipino.
Inpetteng ni Romualdez a nagtalinaed ti Kamara de representantes iti karina nga ipasa dagiti napapateg a gakat para iti pagsayaatan ken panagprogreso ti pagilian.
