LAOAG CITY – Inpasigurado ni House Speaker Ferdinand Martin Romualdez ti suporta na ken ni Presidente Ferdinand Marcos Jr., iti desisyon na a sertipikaran kas urgent ti mailunglungalong a maamendaran ti Rice Tariffication Law (RTL).
Segun ken ni Speaker Romualdez, ti nasao a legislative action ket pammaneknek iti commitment ti gobyerno nga ipababa ti presyo iti merkado dagiti kangrunaan a magatgatang kangrunaan na ti bagas ken protehiran dagiti mannalon ken consumers kontra kadagiti awan ti konsensya na a traders ken profiteers.
Inrakurak met ni Presidente Ferdinand Marcos Jr., a sertipikaran na kas urgent ti nasao a lungalong.
Inpetteng pay ni Romualdez a ti panangsertipikar kas urgent ti presidente iti panangamendar iti Rice Tariffication Law ket maysa a napateg nga addang tapno magun-od ti food security iti amin a Pilipino.
Karaman kadagiti ilunglungalong iti Kamara de representantes ket ti pannakaisubli ti mandato iti National Food Authority nga aglako manen ti bagas iti merkado.
Nagpanawagan met ti House Speaker kadagiti house members nga agkaykaysa tapno maamendaran ti linteg gapu ta lumaka ti presyo ti bagas para kadagiti marigrigat.
Inpetteng pay ni Romualdez a ti ar-aramiden da iti kamara de representantes ket para iti pagsayaatan ti amin a Pilipino.
