LAOAG CITY – Isagsagana ita ti criminal charges ni Davao 1st district Representative Pantaleon Alvarez kontra kada House Speaker Martin Romualdez, Ako Bicol Rep. Elizalde Co ken Zamboanga Rep. Mannix Delipe maipanggep iti makukwestionaran a Bicameral Conference Committee Report seknan iti 2025 General Appropriations Act.
Kadua ni Alvarez iti panangipila ti reklamo ni Atty. Ferdinand Topacio, Citizens Crime Watch (CCW) president a ni Diego Magpantay ken dadduma pay.
Inpetteng ti dati nga House speaker, naaddaan ti nayon a pundo iti national budget a saan met a karaman iti naaprobaran iti bicameral conference committee.
Naammoan a posible a maipila ti kaso iti kabiitan a panawen.
Nupay kasta, immunan nga inkalintegan dagiti sumagmamano nga opisial ti Kamara ti pannakabalbaliw iti budget bill.
Inpetteng ni House Appropriations committee acting head ken Marikina Rep. Stella Luz Quimbo, nasurot dagiti nasken a proseso iti bicam, maikanniwas kadagiti sumagmamano a kritiko.
Inlawlawag ni Quimbo nga awan ti blangko iti enrolled bill uray kitaen pay a personal dagiti kumonkontra iti daytoy.
